November 18 2017

Umwana wo muri Afurika y’Epfo yabaye uwa gatatu ubashije gukira virusi itera Sida

 

Abahanga mu bijyanye n’ubuzima bavuze ko uyu mwana yamaze imyaka isaga umunani afite ubuzima bwiza nyuma y’uko atangijwe imiti akimara kuvuka ariko ikaza guhagarikwa.

Ubusanzwe umuntu ufite ubwandu bwa virusi itera Sida aba agomba gufata imiti igabanya ubukana buri munsi ubuzima bwe bwose kugira ngo imurinde kuba ubwandu bwakomeza kwiyongera.

Abahanga mu by’ubuzima ariko baje gutungurwa nyuma yo kubona ibyavuye mu igerageza ryakorewe kuri uriya mwana byamurikiwe mu nama yabereye i Paris mu Bufaransa.

Iri geragezwa ryakozwe n’Ikigo NIAD (US National Institute of Allergy and Infectious Diseases), cyanakoze ubushakashatsi, bwagaragaje ko gutangira guha imiti igabanya ubukana abana bakiri bato bishobora gutuma babaho igihe kirekire.

Nk’uko Reuters dukesha iyi nkuru yabyanditse, uyu mwana yatangiye guhabwa imiti afite amezi abiri ariko baza kuyihagarika nyuma y’ibyumweru 40 (hafi amezi 10).

Ibizamini byafashwe ubwo uyu mwana yari afite imyaka 9.5, byagaragaje ko virusi nkeya iri muri tumwe mu tunyangingo ariko idafite ubushobozi bwo kuba yakomeza kororoka.

Aba bahanga mu by’ubuzima berekanye ko ari gake cyane ibi bibaho ndetse bikaba ari ikimenyetso cy’uko iki cyorezo cyahitanye abagera kuri miliyoni imwe mu 2016 gishobora kuzabonerwa umuti.

Uyu mwana abaye uwa gatatu ugaragara nk’uwakize nyuma y’abandi babiri barimo ukomoka muri Leta Zunze Ubumwe za Amerika n’undi wo mu Bufaransa.

Uwo mu Bufaransa kuri ubu umaze kugira imyaka 20, agaragara nk’uwakize virusi itera Sida mu gihe yahagaritse gufata imiti igabanya ubukana afite imyaka itandatu gusa. Abantu bakuru nabo bagiye babasha kumara igihe badafata imiti ariko nyuma iyi virusi ikongera kugaragara mu maraso yabo.

Kuva mu 2014 hari gukorwa ubushakashatsi bwatangiriye mu bihugu birimo Afurika y’Epfo na Haiti bugamije kureba niba gutangira guha umwana imiti igabanya ubukana nyuma y’iminsi ibiri avutse, bishobora gutuma akomeza kubaho n’igihe yaba ayihagaritse.

Ku isi yose habarurwa abagera kuri miliyoni 36.7 babana na Virusi itera Sida, 53% bakaba babasha gufata imiti igabanya ubukana.

COMMENTS

NO COMMENTS YET

LEAVE A COMMENT BELOW

OTHER NEWS

Umwana wo muri Afurika y’Epfo yabaye uwa gatatu ubashije gukira virusi itera Sida

Abahanga mu bijyanye n’ubuzima bavuze ko uyu mwana yamaze imyaka isaga umunani (...)

By | 8 August 2017 | 0 (comments)

Gutwara imodoka amasaha arenze abiri ku munsi bigabanya ubushobozi bw’ubwonko

Ni ubushakashatsi bwasohotse mu kinyamakuru Sunday Times, bukaba bwarakozwe (...)

By | 8 August 2017 | 0 (comments)

Kirehe: OMS yatanze imiti ya miliyoni 80 Frw irimo ihashya malaria mu mpunzi z’Abarundi

Ishami ry’Umuryango w’Abibumbye ryita ku Buzima (OMS) ryagobotse impunzi (...)

By | 8 August 2017 | 0 (comments)

Follow us

Read our latest news on any of these social networks